Weltalzheimerdag 21. September 2024

En Deel vun de Membere vum MIL-Chouer sëngt den 21.9.24 um hallwer dräi e puer Lidder aus hirem Repertoire op der Place Clairefontaine am Kader vum Memory Walk organiséiert vun der ALA. Kommt eis ënnerstëtzen a sangt mat 🙂

De MIL Chouer – e Chouer fir jiddereen

Dir sangt gären ? Dir maacht gären eng flott Aktivitéit mat Äre Léifsten zesummen ?

De MIL – Chouer gëtt mat vill Humor a bekannte Melodië vun der Musekspedagogin Jenny Spielmann geleet an ass op fir jiddereen, dee Freed um Sangen huet.

Um Programm stinn Opwiermübungen fir de Kierper an d’Stëmmbänner, kleng Sëtzdänz, einfach Lidder am Kanon an da studéiere mer zesumme bekannte lëtzebuergesch, däitsch a franséisch Lidder an (Wéi meng Mamm nach huet gesponnen, Kiermes am Duerf, Lilli Marleen, Sur le pont d’Avignon a vill anerer).

Mir organiséieren och Concerten. Den 6. Juli hu mer um Summerfest vun der ALA gesongen.

Den 28. September 2024 um 10:30 Auer fënnt déi nächst Seance statt. Sidd Dir intresséiert all zweet Woch Samschdes vun 10:30-11:30 Auer zu Ierpeldeng am Festsall vum Wunn- a Fleegeheem „Beim Goldknapp“ an dësem inklusive Chouer matzesangen, da mellt Iech bei ons: info@milasbl.lu.

Jiddereen ass wëllkomm! E Mënsch mat Demenz soll vun enger Bezugspersoun begleet sinn.

Eng Zesummenaarbecht vun der MIL asbl mam INECC an der Association Luxembourg Alzheimer.

Ënnerstëtzt vun der Oeuvre Nationale de Secours Grande-Duchesse Charlotte

Fotoen: Gilles Seyler